Yoldaşımla ailə həyatı quranda sadə və sevgi dolu bir həyat xəyal edirdik. Təbii ki, hamı kimi olmaq istəyirdik. Evliliyimizdən bir il sonra valideyn olacağımız xəbərini aldıq – üstəlik ikiqat xoşbəxtliyin, yəni əkizlərimizin olacağı xəbəri! Möcüzə!
Hər ana-ata üçün ilk övladı bir möcüzədir və çox xüsusidir, lakin biz 1/14000000 seçilmiş valideyn olduğumuzu qızlarımızın doğulduqları gün öyrəndik – möcüzədir, elə deyilmi?😊
Qızlarımı daha özəl edən odur ki, Daun sindromlu fərqli yumurta əkizləridirlər, bu isə eyni yumurta əkizlərindən daha nadir rast gəlinən bir hadisədir. Bu, həqiqətən də diqqətəlayiqdir və bizim üçün sadəcə lotereyada ikiqat “jackpot” uduşu kimidir.
Sofi və Inci arzuolunan və sevilən bir övladlardır. Onlar 05.06.2021 tarixində qeysəriyyə əməliyyatı olmadan və ekosuz təbii yolla dünyaya gəldilər (öncədən verəcəyiniz sualın cavabı😘).
Əlbəttə ki, ailəmizin hər bir üzvü çətin günlərdən keçib, bu doğrudur və psixologiyada “Qaçılmazı qəbul etmə mərhələləri” kimi tanınan hər bir pilləsini özünəməxsus şəkildə addımlayırdı: İnkar, Qəzəb, Qəbul etmə. Ana olaraq dünyam iki dəfə başdan-ayağa dönüb, lakin uşaqlarım diaqnoza görə bir saniyə belə daha az sevilməyiblər və ya daha az əzizlənməyiblər. Bizim ailəmizdə diaqnoz deyil, iki gözəl mələk üzlü qızlarımız doğulub. Bu gedişlə çox ərköyün böyüyəcəklər😊
İndi Yaradanın bizə hədiyyə kimi bəxş etdiyi iki dünya gözəli günəş qızların valideynləriyik. Əlavə xromosomları isə onları daha da xüsusi və qeyri-adi edir. Sofi və İncinin valideynləri olduğumuz üçün fəxr edirik və daim də edəcəyik.
Add Comment